عرض مشاركة واحدة
قديم 06-04-2015, 10:22 PM  
مشرف سابق
 
الصورة الرمزية Mr.Meshal
رقـم العضويــة: 189618
تاريخ التسجيل: Mar 2013
الجنس:
المشـــاركـات: 8,562
مــرات الشكر: 18
نقـــاط الخبـرة: 1964

افتراضي رد: Otaku cafe ( النسخة الرابعة )




بسم الله الرحمن الرحيم ..¬

السلام عليكم ورحمة الله وبركاته

كيف حآل الجميع ؟! , بخير وصحه وعافيه ان شاء الله ..

اكيييد طبعاً شفتم السالفه فيها بوستر وكلام كثييير وقلتم وش يبي النشبه ذا

بس آسف والله غصب علي .. قبل مده خلصت أنمي من أسطر الأنميات بالنسبة لي ..

وحرآم أكتب رأي بسييط عنه

فتقديراً لأنمي أحترمه وأقدره كثييير زي هذا الأنمي .. لابد من عمل انطباع طويل قليلا

عآد ان شاء الله ما يكون طوييل مره , يعني طويل شوي بس

عآد من زمآن ما كتبت ريفيو طوييل , ان شاء الله يكون الريفيو قد نصف او ربع حتى روعة الأنمي

طبعاً زي ما هو واضح من البوستر ..

الإنطبآع راح يكون عن أنمي كايجي :



أبتكلم عن جوانب كثيييرة بالأنمي .. إن شاء الله ما اطول ..

أحس اني فليتها شوي بالمقدمه

خلاص بسم الله نبدأ :



l فهرس الإنطبآع l

دليل إن الإنطبآع طويل حطيت له فهرس بعد

.. معلومات عآمة عن الأنمي ..
.. مرآجعة الأحدآث .. ( أكثر فقرة راح ينسحب عليها ) .
.. إنطبآعي عن الأنمي ..
.. الكوميديا ..
.. الدرآما ..
.. شد الأعصاب ..
.. الإنتاج ..
.. الشخصيات ..
.. إيجابيات الأنمي ..
.. سلبيات الأنمي ..
.. تقييمي للأنمي ..




l معلومات عآمه عن الأنمي l

إسم الأنمي :


بـ العربي : كايجي .
بـ الإنجليزية : Kaiji .
بـ اليابانية : カイジ .

عدد الحلقات :

الموسم الأول : 26 حلقة .
الموسم الثاني : 26 حلقة .

الحاله : منتهي " كلا الجزءان " .

موعد البث :

الموسم الأول : 3 أكتوبر 2007 إلى 2 أبريل 2008 .
الموسم الثاني : 6 أبريل 2011 إلى 28 سبتمبر 2011 .

إستديو الإنتاج : Madhouse .

التصنيف العمري : +17 .

النوع : سينين , نفسي , دراما , ألعاب .



l مراجعة الأحدآث l

طبعاً هذه أطول فقرة بالإنطبآع ..

أنا شبه متأكد إن ثلاثة أرباع قآرئين هذا الإنطبآع المخيس بيسحبون على الفقرة هذي

لأني تفلسفت فيها أكثر مما ينبغي

طبعاً كانت الفكرة إني أكتب ملخص بسيط لأحداث الإنمي ..

وإنتهى بي الحال بمراجعة الأحداث بشكل تفصيلي للأسف

اللي يعرف إنطبآعاتي لحلقات ناروتو وون بيس الأسبوعية اللي كنت أكتبها سابقاً ..

فأنا سويت مثلها بس لأنمي طويل

يعني متخيلين كمية الفلسفة اللي راح تكون بالفقرة

طبعاً الأنمي أربع آركات .. الآرك الأول أبداً ما كثّرت كلام فيه ..

لكن الآرك الثاني كان فيه فلسفة بسيطة ,

حتى وأنا أكتب الآرك الثاني كنت نآوي أكنسل الفقرة لأني شفت مالها داعي وكلآم محد راح يقراه

بس فعلياً كتبت كثيير منها وقلت والله غير تنزل

المشكلة إن الآرك الثالث والرابع الكلام والمراجعة فيه أطول بكثيير من الآرك الأول والثاني ..

خصوصاً آخر آرك في الأنمي

يعني المفروض أقلل بعد ما كتبت الآرك الثاني إلا أني زودت الكلام أكثر

عموماً إن شاء الله أحد منكم يقرا البربرة هذي


بسم الله



الآرك الأول : سفينة إسبوار .





الآرك الثاني : فندق ستارسايد .















بهذا الشكل نكون قد لخصنا أحداث الجزء الأول من الأنمي ..!

زي ما ذكرت في البداية بأن بداية الأنمي قوية جداً بنظري ..

الجزء ككل يعتبر آركين فقط .. يتخللها أربعة ألعاب أسطورية ..

كل لعبة أفضل من الثانية بكثيير ..

جزء أسطوري جداً ..!

ما راح أقيم الجزء لوحده .. لأني راح أقيم العمل ككل في نهاية الإنطباع بإذن الله

الجزء الثاني ..! , هل سيكون بمثل روعة الجزء الثاني ام سينخفض المستوى ..!

نُكمل الإنطباع >> يعنني مسوي اثارة وكذا



الآرك الثالث : الأحداث في العآلم السفلي .





الآرك الرابع : المستنقع الآكل للحم البشر .






واخيراً إنتهينا من مراجعة الجزء الثاني بعد تعب شديد

الجزء الثاني أقوى من الأول بالنسبة لي ..

مثل الجزء الأول يحتوي الجزء الثاني على آركين ..

وكل واحد أحلى من الثاني ..

الأنمي ككل يعتبر أربع آركات .. وكلها أسطورية ..

الآن نُكمل باقي الإنطباع بعد ما إنتهينا أخيراً من مراجعة الأحداث وتفلسفنا شوي وطولناها وهي قصيره




l إنطبآعي عن الأنمي l

أنمي كايجي من أروع الأنميات التي شاهدتها وبلا منازع ..

طبعاً أنا أعرف الأنمي من زمان

يعني قبل ثلاث او اربع سنوات حتى كنت اعرف الأنمي ..

لكن اذكر كنت مشمئز من تصميم الشخصيات , وأي شخص راح يوافقني بهذه النقطه ..

لكني وضعته بالقائمه من سنه تقريباً .. وأخيراً شفته ..

تصميم الشخصيات دخلت جو معه من الحلقة الأولى مباشرةً وما أثر علي بتاتاً البته ..

وبالعكس من وجهة نظري الشخصية لو كان تصميم كايجي زي تصميم اي انمي آخر عآدي ..

ما اظن بيكون رهيييب .. كرهابة التصميم هذا



l الكوميديا l

كايجي أساساً أنمي مب كوميدي ..

لكن توجد فيه العديد من اللقطات السعيدة وليست المضحكة

طبعاً أغلبها يكون إذا انتصر كايجي أو إذا تقدم خطوة جديده تقرّبه من الفوز ..

وهي عديدة وكثيرة , اللي بيقرأ المراجعة بيشوف أغلبها

لكن إذا جينا للقطات الكوميدية .. فهي قليلة جداً لأن الأنمي ليس بكوميدي كما ذكرت ..

بس يمكن لقطة أو لقطتين وكانت بالجزء الثاني هي اللي كانت مضحكة

موكيكو إبنة ساكازاكي

يقولك القرد بعين أمه غزال

وفي رواية بعين أبوه

وبعد عندك بنهاية الأنمي كايجي يوم يرفض مقابلة مجموعة الـ 45 لأنه مطفر

وسبب إفلاسه هذا لأنه ضيع فلوسه بالباجينكو

مع انه توه منتصر على المستنقع وهو الباجينكو الأكبر ..

وفاز عليه بشق الأنفس وخلص ديونه ,

يروح بعدها يضيع الفلوس اليسيرة اللي بقت له بلعب الباجينكو مرة ثانيه

والله ياهو ما يتوب

اللي بيقرأ الإنطبآع بيشوف يمكن لقطة أو لقطتين أضحكتني وعلقت تعليق بسيط عليها

عموماً الأنمي ليس بكوميدي فالفقرة ذي مالها دآعي أساساً ..



l الدراما l

الدرآما في كايجي من أحد مميزات وإبداعات الأنمي

طبعاً أغلب لقطات الحزن اللي تصير في كايجي مختلفة نوعاً ما عن أغلب لقطات الحزن اللي تشوفونها في باقي الانميات ..

نقدر نفسرها بمفهوم آخر أفضل .. " القهر "

يعني حتى المشاهد ينقهر ويضيق صدره ويحزن للي صار لكايجي ..

مب موت شخص عزيز عليه .. ولا فقدان وفراق ..

الخدآع اللي يجيه , الغدر , الخيآنة , الخسآرة .. الطفارة

خصوصاً إذا كان كايجي قريب من الفوز وبعدها يخسر عن طريق الغش ويكتشف طريقة الغش هذي .. شيء يغبن والله

يعني من اللقطات الكبيييرة اللي تقهر وتحزّن بنفس الوقت ..

آندو وفوريهاتا يوم غدروا في كايجي بكل بساطة ..

بعد ما ساعدهم وأنقذهم مع إنهم كانوا خسرانين ..

غدروا فيه بكل بساطة عندما إحتاج مساعدتهم . تباً لهم

خصوصاً الدب آندو .. والله ياهو يقهر هالمربرب

بس كايجي برد حرتي فيهم شوي , شوي مره

,,’

وعندك بعد من اللقطات الحزينة موت إيشيدا وموت ساهارا

صراحة طريقة موتهم خصوصاً ساهارا تقهر ..

يعني أنا قلت على الأقل ساهارا وكايجي يعيشون ويفكون ديونهم .. طلع ما عاش إلا كايجي ولا ودينه ما انفك بعد ..

جاه دين زيادة على دينه السابق

وسالفة الكهرب وعدم إطفاءهم من تونيجاوا تقهر ..

وفوز هيودو القذر كان يقهر , صحيح ان كايجي كان يبي يغش بعد

بس غش كايجي نقبله بس غش هيودو لا يُقبل

والأحداث اللي صارت بين كايجي وإيتشيجو زي سالفة أظافر كايجي وغيرها كانت تقهر

الدرآما في الأنمي ممتازة جداً



l شد الأعصاب l

أهم شيء في الأنمي .. لبُّ الأنمي نقدر نقول

الحين متابعين كايجي معروفين إذا سئلهم شخص وشو أنمي كايجي

أو أبي أتابع كايجي

على طول يقولون لك " خل علبة الموية وحبوب الضغط جنبك "

لأن الأنمي يرفع ضغطك ويقهرك ويشد أعصابك على الآخر ..

هذي ميزة الأنمي الكبرى وهي أروع شيء فيه

أعرف ناس بدوا متابعة الأنمي وخلصوا جزء كبيير منه بعدين وقفوا عنه وراحوا يشوفون شيء ثاني ..

مب عشانه أنمي سيء .. لا هو يعترف إنه أسطوري ..

بس يقولك أبي أريح شوي , أعصابي انهارت

كل آركات الأنمي الأربع فيها شد أعصاب .. في كل الألعاب الست ..

لعبة حجر ورقة مقص فيها شد أعصاب ..

لعبة سباق البشر فيها شد أعصاب غير طبيعي يتفوق على لعبة حجر ورقة مقص بالراحة ..!

تونيجاوا ضد كايجي في لعبة بطاقة إي " إي كارد " شد أعصاب أقوى بكثييير من سباق البشر

لعبة اليانصيب ضد هيودو في نهاية الجزء الأول كان هناك شد أعصاب عآلي .. خصوصاً بعد هيآط هيودو وهل سينجح في أخذ الورقة الفائزة أم لا ..!

الجزء الثاني .. لعبة الجينجيرو .. شد الأعصاب موجود أكيد فهذا كايجي

لكنه يمكن أقل من الألعاب السابقة .. بس تخطيط كايجي بهذه اللعبة أفضل من الألعاب السابقة أكيد

اللعبة الأخيرة في الأنمي .. قتال كايجي ضد المستنقع

شد الأعصاب هنا ألف يا حبيبي

ما انشدت أعصابي طول متابعتي للأنمي بمثل هذا الآرك وهذه اللعبة ..

شيء أسطوري يا رجل

طبعاً أكثر آرك شد أعصابي طبيعي يكون أكثر آرك أمتعني

للي بيقرأ المراجعة بيشوف أكثر اللقطات اللي شدت أعصابي بالآرك .. أو بالأحرى بالأنمي كامل

أنمي كايجي فن في كيفية شد أعصاب المشاهد



l الإنتاج l

إذا جينا نتكلم عن الإنتاج فهي كلمة واحدة بمقدورها أن تبين لكم جودة إنتاج العمل ..

" مادهاوس "

الإستديو الأسطوري مادهاوس .. المميز بإختيار المانجات المميزة ..

العديد والعديد من المانجات الرائعة .. التي يأخذها ويحولها لأنميات ممتازة لأسطورية

مونستر _ هاجيمي نو ايبو _ كلايمور _ ترايجين _ ون اوتس ..

هذه الأنميات أنا ما شفتها لكن شفت إطراء كبيير عليها من المتابعين لها

أما بالنسبة للي شفتها فعلى قلتها إلا أنها قوية

ديث نوت _ هنتر _ رينبو _ الطفيليات ..

وأخيراً كايجي

عمل الإستديو في كايجي جداً جداً مميز وقوي ..

يجيك شخص يقول شايف الرسم أنت عشان تقول عملهم قوي ..

الرد عليه ببساطة .. نعم عملهم جداً قوي , الرسم ممتاز .. التحريك ممتاز .. الأوستات جداً ممتازة .. الستوريبورد وغيرها من عمليات الإنتاج الكل بنظري كان مميز وممتاز ..

تصميم الشخصيات هذا كان من المؤلف .. وهو تصميم مميز .. لا دخل له بقوة الرسم من عدمه

أكثر شيء أبدع به الإستديو هو كيييف قدر يشد أعصاب المتابع لهذه الدرجة ..

صحيح هذا شيء تميز به مؤلف المانجا .. لكن لو لم يكن الإستديو بهذا التميز أيضاً ..

لما رأينا الأنمي بهذه الحلة .. وهذه القوة ..

أوستات الأنمي جداً جداً رهييييييبة

المؤثرات اللي يحطونها في لحظات التفاجئ رهيييبه مره

" زوا زوا " >> اللي تابع كايجي بيفهمها

الأوبينينق والإيدينينق اللي بالجزء الأول ..

قصيرات جداً لكن رهييييبات مره ..

خصوصاً الأوبينينق

الجزء الثاني ما كان فيه لا أوبينينق ولا إيدينينق ..

بس بنهاية الجزء الثاني حطوا أغنية بداية الجزء الأول في نهاية الجزء الثاني

كان شيء رهييييب جداً

المعلق وما أدراك مالمعلق

هذا مب شيء يُحسب للإستديو بس لأني أعتقد أنه من المؤلف بعد

لكن المعلق كان مبدع جداً بدوره وبحماسه وشرحه للخطط والجمل الرنّانة اللي يقولها >> متعوب عليها رنّانة

بإختصار شديد ..

رسم رائع ..

أنميشن ممتاز ..

أوستات رهيييبة ..

طريقة عرض الأحداث ممتازة جداً ..

إنتاجياً رائع جداً

شكراً مادهاوس

يستاهلون نشكرهم بخط كبييير وعريض على هذه التحفة الي أمتعونا بها

شكراً مره ثانيه



l الشخصيات l

طيب بالنسبة للشخصيات

شخصيات كايجي الرئيسية والمؤثرة قليلة ..

راح أعلق على بعضها إن شاء الله تعليقات بسيطة

إن شاء الله ما أتفلسف زيادة عن اللزوم يا رب

بسم الله نبدأ بدون فلسفة :

إيتو كايجي / Itou Kaiji :




الشخصية الرئيسية .. بطل الأنمي كايجي

أفضل شخصية بالأنمي طبعاً , ومن أفضل الشخصيات بشكل عآم

شخصية تخطيطها فاق التوقع ..

يعني خططه للخروج من الأزمات بطلة جداً .. خططه اللي يكون محضّرها من فترة أسطورية جداً ..

حتى لو حصل شيء غير اعتيادي وفشلت الخطة يقدر يجيب لك خطة ثانيه ..

طبعاً بعد ما يضيق صدره ويقعد يصيح شوي يمكن يكتشف خطة جديده

الخطة الأكبر واللي أبهرتني مره وخلتني أحبه أكثر ..

خطته للفوز على المستنقع

خطة أسطورية جداً خلتني أنبهر بصورة غير طبيعية أبداً

يا ربآه يا كايجي

بعد من المواقف الي خلتني أحبه أكثر

هياطه على أوتسوكي وإيتشيجو

يوم يكب الجعة على وجه أوتسوكي

وبعد يوم يشق بطاقة إيتشيجو ..

شيء رهيييب جداً يا رجل

أفضل شخصية بالأنمي .. ومن أفضل الشخصيات بشكل عام كما ذكرت سابقاً





يوجي إندو / Yuuji Endou :

الصراحة هذه الشخصية كان موقفي متذبذب معها

يعني كرهته فترة , بعدين حبيته فترة , بعدين كرهته مرة ثانيه كره أكبر من قبل

يعني بالجزء الأول .. كان شخصية ينكره شوي

بدا الجزء الثاني ويوم قرر كايجي يضمه معه عشان يلعب ضد المستنقع ..

كانت شخصيته حليوه هناك

لكن بآخر حلقة تغير كل شيء

خصوصاً يوم غدر بكايجي وأخذ أكثر من نص فلوس كايجي بسبب ورقة العقد

الكلمة الوحيدة اللي أقولها عنه .. تباً له





هيودو كازوتاكا / Hyoudou Kazutaka :

من أكره الشخصيات الصراحة

شخصية كريهة جداً ومستفزة

حتى ضد موظفيه ما يرحم .. شف وش سوا بتونيجاوا بعد ما خسر

يوم يعذبه بالكوي

وصخ والله

كان ختام الجزء الأول به

بإنتصاره على كايجي وقص أصابعه

وكان ظهوره جداً قوي هناك ..

لكن بالجزء الثاني ما طلع أساساً إلا بآخر آرك وبشكل قليل

تمنيت يطلع ويجلده كايجي بس يالله مهب مشكلة

شخصية مستفزة





يوكي تونيجاوا / Yukio Tonegawa :

شخصية ما أقول إنها سيئة .. ولا ممتازة ..

شخصية جيدة نقدر نقول

إستمتعت جداً بمباراته في لعبة " بطاقة إي " ضد كايجي ..

كانت أحداث جداً رائعه ..

بس مشكته إنه غبي كان يخدم شخص خبيث زي هيودو

يستاهل التعذيب اللي جاه منه

شخصية يعني جيدة





أوتسوكي / Ootsuki :

شخصية تقهر هي الأخرى

أسلوب كلامه وشخصيته تقهر ..

كايجي برد حرتي فيه بكب الجعة على وجهه

والله ياصفقت لكايجي بقوة بسبب هالشيء

نهايته كانت تبرد الخاطر مرررررررره

نهاية تليق بشخصية خايسة زي ذا

تطفيييير على الآخر

كبيييير يا كايجي

شخصية خايسه





سيا إيتشيجو / Seiya Ichijou :

شخصية تقهر هي الأخرى لكنه أضاف للقصة كثييير زي أوتسوكي

قتاله الأخير ضد كايجي كان قمة في الروعة ..

إيتشيجو شخصية ذكية بس كايجي أذكى

الصراحة أعجبني وبنفس الوقت استفزني إستحقار هيودو له

وصخ هيودو

شخصية جيدة نقدر نقول





كوتارو ساكازاكي / Kotaro Sakazaki :

شخصية جيدة الصراحه

هو اللي عرف كايجي على المستنقع .. وحاول يهزم المستنقع مع ان محاولته بائسة

ويحب بنته على قبحها حب كبييير أكيد فهي بنته

والموقف اللي خلاني أحبه وأقدره ..

هو بعد ما كان كايجي بيخسر ولا خسر بالأحرى وخلص منه المال

تدخل ساكازاكي دخله بطله لمبلغ 20 مليون لمساعدة كايجي عشان يهزم المستنقع

كم أنت كبييير يا ساكازاكي

شخصية جيدة



l إيجابيات الأنمي l

نقدر نلخص إيجابيات الأنمي بكم شغلة ..

مادهاوس .. بالتأكيد أحد إيجابيات الأنمي أن من عمل عليه إستديو قدييير مثل هذا ..

شد الأعصاب .. وهذه إيجابية كبيييرة جداً بالأنمي لولاها لأصبح العمل عادي أو جيد لكن لن يصبح أسطوري


أحداث قوية جداً ..

اممم مدري وش الباقي الصراحة .. بس العمل كله على بعض إيجابياته كثييرة وممتع




l سلبيات الأنمي l

لا شيء

صدق والله ما أشوف العمل فيه سلبية واضحة وخربت الأنمي ..

يمكن شغلة واحده بس أشوف الأنمي غير موجودة فيه الشغلة ذي ..

وهي الشخصيات ..

يعني ما فيه شخصية رهييييييبة جداً وفخمة غييير كايجي

مع إن هذا الشيء أبدا ما أثّر على قوة الأحداث وفخامتها ..

والشخصيات اللي كانت ضد كايجي كانت قوية وأضافت جو رهيييب للأنمي ..

لكنها شخصيات ما تنحب
وتقول هذه الشخصية فخمة وتدخل من ضمن التوب ومن هالكلام

لا شخصيات مميزة ودورها كان قوي

فقط لا غير ..

ولا الأنمي زي ما قلت كله على بعض مليء بالإيجابيات وما أشوف فيه سلبية واضحة ومؤثرة وخربت الأنمي



l تقييمي للأنمي l

راح أقيم الأنمي ككل بدون تقسيم الجزء الأول عن الثاني ..

للشخص اللي قرأ الإنطبآع بأكمله ..

بما فيه فقرة " مراجعة الأحداث " ..

صراحة بيعرف كم تقييمي للأنمي وبدون تفكير

لكن أنا راح أفاجئه وأعطيه تقييم ما يتوقعه >> لا يكثر بس

تقييمي للأنمي بشكل كآمل : خآرج نطاق التقييم

يعني من رهابته وكذا خليته خارج نطاق التقييم >> قل والله

يعني تقدرون تقولون التقييم 20/10

أنمي أسطوري



بس أخيرا خلصنا

شكراً للمصمم اللي صمم لي الطقم الخورافي هذا

وآسف أشد الأسف على كثرة الكلام والبربرة الزايدة ..

وأعتذر على الإزعاج وعلى تعليقي لمتصفحاتكم بكثرة الصور

وآسف على الإطالة >> يا كثر إعتذاراتك

شكراً لكم ..

وفي أمان الله







التعديل الأخير تم بواسطة Mr.Meshal ; 06-04-2015 الساعة 10:33 PM
Mr.Meshal غير متواجد حالياً